Propuesto Ordinansa Que Ya Hace Pasa El Consejal Valesco, Un Ley Ya Este Maga Tiempo

EL PROPUESTO ORDINANSA PARA ESTABLISE EL PRIMER PASALUBONG CENTER AQUI NA CIUDAD FINALMENTE AY REALIZA YA PORCAOSA KAY UN LEY YA ESTE NA CIUDAD.

EL PROPUESTO ORDINANSA QUE YA MAN AUTHOR EL ACTIVO CONSEJAL VALESCO YA QUEDA YA LEY DESPUES EL CONSEJO LOCAO YA APROVA YA CUNESTE DURANTE NA REGULAR SESSION AYER.

EL PRODUCTO DEL ZAMBOANGA PASALUBONG CENTER QUE UN IDEA DI VALESCO AY PURCIGI YA PLANTA NA MAGA DIAS QUE BIENE , PENDIENTE EL LOCACION QUE AY DETERMINA EL ALCALDE CELSO LOBREGAT .

BAHO NA IDEA Y PLANO DEL CONSEHAL GERKY VALESCO QUIEN EL CHAIRMAN DEL COMMITTEE ON TOURISM NA CONSEHO , EL PRODUCTO DE ZAMBOANGA PASALUBONG CENTER AY KEDA EL LUGAR DONDE TODO EL MAGA GULUSINAS COMO COMIDA , ROPA , ALAJAS Y OTRAS PA QUE HECHO NA ZAMBOANGA AY PONE NA DISPLAY PARA BENDE.

ASEGUN CUN VALESCO ESTE MODO AY MAN ENCOURAGE CUNEL MAGA VIVIENTES PARA MAN DEVELOP EL MODO DE BUSCA VIDA Y NEGOSYO

PERO ASEGUN CUN EL MAGA CONSEJALES YA ADMIRA SILA EL IDEA DI VALESCO , DONDE EL PUEBLO AMO AY BENEFICIA CUNESTE MUCHO. -Melanie Guazon, RMN Radio

Tropa Kano, Posible Embuelto na Operasyon Militar na Sulu

POSIBLE EMBUELTO EL TROPA DEL ESTADOS UNIDOS NA OPERATION DEL MILITAR NA BARANGAY IPIL MAIBUNG TOWN DLE LUNES MADROGADA , DONDE YA MAN ENCUENTRO CUN EL BANDIDO GRUPO ABU SAYYAF QUE YA RESULTA EL MUERTE DEL SIETE MAGA INOCENTE CIVILLIAN Y UN SOLDAO.

EL MAGA SOLDAO PILIPINO QUIEN YA QUEDA PARTE DEL TRAINING DESDE CUNEL TROPA AMERICANO , CUN QUIEN HAURA TA DISCULPA EL MAGA SULUHANUS EMBUELTO NA MUERTE DEL OCHO PERSONA INCLUHIDO EL CUATRO MAGA MENOR DE EDAD .

PERO EL MILITAR TA CONTINUA PARA DURO QUE LEHITIMO EL DIILA OPERATION , QUE YA RESULTA EL DOS MUERTO SOLDAO Y TRES REBELDE .

PERO ASEGUN CUN UN RESIDENTE NA MENCIONAO LUGAR , YA PUEDE LE MIRA CUATRO AMERICANO SOLDAO ABORDO NA UN NAVAL BOAT DURANTE EL OPERATION .

ASEGUN CUN EL MAGA RESIDENTES EL PRESENCIA DEL MAGA AMERICANO SOLDAO HINDE PARA AYUDA CUNEL DIILA LUGAR , SINO PARTE ESTOS QUIEN TA VIOLA CUNEL DERECHO DEL CADA KARNE HUMANO , QUE UN VIOLACION NA CONSTITUTION DEL PILIPINAS. -Melanie Guanzon, RMN Radio

Committee Hearing, Ta Pide El Consejo Local Na Distribuccion De Maga Medicina

TA PIDI EL MAGA CONSEJALES LOCAL CUNEL CHAIRMAN DEL COMMITTEE ON HEALTH AND SANTITATION LILIA MACROHON NUÑO PARA CONDUCI COMMITTEE HEARING Y IMBITA CUNEL MAGA AHENCIA CONCIERNE PARTICULARMENTE EL CITY HEALTH OFFICE PARABER PUEDE DISCUTI SOBRE EL ASUNTO DE DISTRIBUCION DE MAGA MEDICINA CUNEL MAGA POBRE VIVIENTES DEL CIUDAD

SI NUÑO TA PIDI AYER DURANTE EL REGULAR SESSION NA CONSEHO PARA ASE SUBI EL PONDO DEL ALLOCACION DEL MEDICINA , DONDE EL PRESENTE PONDO DE ESTE TA ALCANSA NA VEINTE MILYON DE PESOS.

YA HABLA SI NUÑO EN ESTE MANERA AY PUEDE PA MAS ANCHA EL SERVICIO MEDICAL CUNEL MAGA POBRE VIVIENTES DEL CIUDAD.

PERO EL CONSEJAL KIM ELAGO TA QUESTION SI PORQUE MASKIN TIENE YA BASTANTE MEDICINA , PERO EL MAGA POBRE VIVIENTES TA DEPENDE PA MUCHO CUNEL MAGA CONSEJALES .

SI ELAGO TA QUESTIONA KAY CADAVEZ ESTOS MAGA IDIGENT PATIENT TA ANDA NA OPISINA DE SALUD TA HABLA ASEGUN CANILA QUE NUAY MAS YA MEDICINA PERO SI EL TAL CONSEJAL TA LLAMA TIENE ESTOS COSA TA PUEDE DALE , SEMEHANTE TAMBIEN EL REVELACION DEL CONSEHALA LYNETTE MARCOS ABARRO HABLANDO QUE TIENE MAGA BARANGAY HEALTH CENTER EL TA BENDE CUNEL MEDICINA DESDE CUNEL MAGA RESIDENTES.

PORCAOSA CUNESTE EL CONSEHO LOCAL YA DECIDI PARA IMBESTIGA , Y IMBITA CUNEL CITY HEALTH OFFICER DR.RODELYN AGBULOS NA DIILA SIGUENTE SESSION PARABER CONTESTA CUN EL CUANTOS MAGA ALEGACION. -Melanie Guanzon, RMN Radio